Добрите дела ги топлат душите – и на сторителите и на уживателите – но, за првите следуваат плус здравствени бенефиции.
Забележувате ли малку повеќе човечност во воздухот? Се чини дека добрината го живее својот момент. Дали овде зборуваме за посткорона реакција или за некаков природен механизам на балансирање помеѓу доброто и злото? Сосем сеедно е! Но, пред да скокнете целосно отфрлувајќи ја тезата, бидејќи сѐ уште никакво добро не сте почувствувале, имајте го на ум следното: Невозможно е да го контролирате светот, ниту пак своето опкружување, но и тоа како го контролирате своето дејствување. Затоа, сторете добро и со добро ќе ви се врати. Плус, споделувајќи љубов ќе дојдете до низа здравствени бенефиции. 
 
ПОЗДРАВО СРЦЕ
Трошењето пари на други ја подобрува кардиоваскуларната функција, откри студијата во Здравствената психологија. Учесниците во студијата добивале по 35 евра неделно во период од 3 недели, притоа, парите можеле да ги трошат за себе или за други. Кај луѓето, кои дадените пари ги потрошиле за други, бил забележан пад на крвниот притисок. Авторите на студијата претпоставуваат дека промената се должи на нагласеното чувство на социјална поврзаност и намалување на нивото на стрес (чувства кои обезбедуваат здраво срце), што дошле до израз благодарение на великодушните постапки.
Вашиот потег:Нема потреба да одвојувате високи суми, и малку потрошените пари како педесетина денари за 100 г кафе, ќе завршат работа – тврди авторот на студијата,д-рЕшли Виланс,од „Бизнис школата Харвард“. Без повод, купете ѓеврек за себе и за колегата. 
 
ПОСРЕЌНИ ВИЕ
Добрите дела го зголемуваат нивото на окситоцин (хормон одговорен за среќата на човекот), а тоа ќе го подобри вашето расположение и ќе ги намали анксиозните чувства. Изненадувачки, истото се случува и кога ќе посведочите нечија великодушност.
Вашиот потег:Нешто што со сигурност може да ја поттикне споменатата анксиозност? Кога некоја фрустрирана душичка ќе ве нападне како гром од ведро небо. Обидете се да одолеете на потребата да возвратите со слични отровни стрели и премолчете! Потсетете се дека најверојатно не станува збор за нешто лично против вас. Честопати забораваме дека и другите луѓе се само луѓе коишто се обидуваат да го истуркаат денот на најдобар можен начин. Затоа, прекинете го кругот на ширење негативна енергија и опкружете се со љубезни луѓе колку што можете почесто – студиите велат дека љубезноста и добрината се заразни. 
 
ПОДОЛГ ЖИВОТ
Кога луѓето, и покрај тоа што се соочиле со стресен настан (загуба на некој близок или финансиска криза) ќе продолжат да прават добри дела во истата година, голема е веројатноста да го продолжат својот животен век, тврди студијата објавена во „Американскиот весник за јавно здравје“. Авторите на студијата веруваат дека добрината гоамортизира стресот и ја поттикнува издржливоста на човекот кој се соочува со тешкотии.
Вашиот потег: Помагањето на другите нека ви стане навика. Понудете им превоз на пријателите коишто останаа без автомобил или појдете по набавки во име на соседите. Редовно одвојте дел од вашето време и енергија да им помагате и на луѓето и на животните – запомнете, сѐ се брои!
 
ПОСИЛЕН ИМУНИТЕТ
Преку постојано изложување на позитивни емоции како сочувство, емпатија, благодарност, и несомнено вашиот одбранбен систем ќе стане посилен и од челик. Кај луѓето кои учествувале во петминутна практика на изразување вакви емоции, било забележано покачување на имуноглобулинот А – антитело коешто се бори со вирусите, се вели во истражувањето објавено во „Весникотза напредок во медицината“. 
Вашиот потег:Посветете 5 минути за да размислите за личностите за коишто се грижите, почнете со една. Да, толку е лесно! За посилен ефект, напишете ѝ писмо во кое детално ќе опишете зошто ја почитувате личноста. Не мора ниту да го пратите писмото, советува Соња Љубомирски, професорка по психологија на „Универзитетот на Калифорнија“во Риверсајд. Студиите покажуваат дека само преку артикулирање на мислите, ќе се чувствувате поповрзани со личноста, но ќе станете и посклони да делувате водејќи се според тие благородни чувства. 
 Кој предничи на нутритивната листа? 




Пилешко Јајца
35,9 кг пиле и 14,3 кг пилешки стек е просечниот годишен потрошувачки износ на едно македонско домаќинство.  

VS

724 јајца е просечната годишна потрошувачка на јајца на едно македонско домаќинство.
 
Пилешкото месо е богато со омега-3 масни киселини што го подобруваат оптималниот капацитет на срцето, белите дробови и мускулите, ефективно да го користат кислородот при вежбање. 
 
 
 
 

Што вели науката?

 
Во студијата на „Универзитетотна Илиноис“, се вели дека високоприсутниот лутеин во жолчката делува одбранбено при првите напади на деменција. Студијата од „Харвард“, истата состојка ја поврзува со намален ризик од визуелни оштетувања во зрелата доба. 
 
Пилешкото месо е познат извор на протеини што се неопходни за раст на мускулите – во 100 г пилешко месо има 31 г протеини и само 3.6 г масти (само ако избегнувате да ја јадете кожата), а исто така содржи и многу селен – минерал кој се поврзува со губењето масти. 
 
 
 
 

Доброто кај нив

 
Две големи јајца ќе ве обезбедат со 12 г протеини, што ги прави одличен оброк за по вежбање, но исто така јајцата содржат речиси двојно повеќе рибофлавин – делува антиканцерогено – и витамин Б12 – ја поттикнува мозочната функција – во однос на месото. 
 
Секогаш кога можете купувајте пилешко месо од село, бидејќи кокошките коишто не се одгледани на фарма, туку се слободно пуштени во двор, се побогати со витамин Е и имаат 50% помалку масти. 
 
 
 

Лошото кај нив

 
Јајцата содржат речиси иста количина масти како и протеини и се извор на холестерол. Но, не е вистина дека треба да јадете максимум 4 јајца неделно. Холестеролот во храната има многу мало влијание врз холестеролот во крвта – заситените масти се оние што треба да ве плашат, затоа наместо пржени, јадете варени јајца. 
 
„Темното пилешко месо е многу побогато со хранливи материи. Копаните и крилцата содржат малку повеќе железо и цинк. Но, јадете го и потемното и посветлото месо за да дојдете до нутритивен микс“, советува Рик Милер, клинички и спортски диететичар. 
 
 

Експертско мислење

 
„Јајцата се богат извор на холин – малку позната хранлива материја којашто е корисна за здравјето на мозокот и нервниот систем. Бидејќи се богати со витамини Б12 и Б6, јајцата го помагаат ослободувањето на енергија од храната“, вели Рианон Ламберт, нутриционист. 
 

Сепак, јајцето е прво!
Ова ќе им се допадне на оние што не јадат месо – јајцата имаат далеку посупериорен нутритивен профил, поради што важат за мултивитамини коишто ги поттикнуваат истовремено и мозокот и мускулите. 
Кога брзиот извор на витамини и минерали станува опасен по здравјето?
 
Не постои кујна во која нема соковник или блендер со што луѓето подготвуваат вкусни напивки со неверојатни нутритивни потенцијали. Преку неколку неодоливи голтки, стигнуваме до неопходните витамини и минерали.
Како што вели Алана Мекдоналд, диететичарка од Британската диететска асоцијација: „Дури и луѓето коишто водат сметка за здравата исхрана, консумираат многу помалку овошје и зеленчук од потребното, а соковите и смутињата се брз и лесен начин да стигнете до високи дози на есенцијалните витамини и минерали и тоа во од“.
Но, таа предупредува дека зад бананите, спанаќот и бадемите, се кријат низа здравствени замки: „При цедење, месото од овошјето завршува во кантата за отпадоци, тоа значи дека составот на напивката се сведува на слободни шеќери“. Од друга страна, смутињата најчесто содржат млеко, путер од јатки, протеински прав и уште низа други состојки, кои во комбинација чинат една голема калориска бомба. 
Уште еден проблем е тоа што многу лесно може да се предозирате со смути или со цеден сок. Тие се пијат во еден здив, а ретко кој од нас би можел да ги изеде, една по една, намирниците застапени во едно смути, или да изеде онолку овошје колку што е исцедено во една чаша. 

НЕ ФРЛАЈТЕ ГИ ЛУШПИТЕ
„Цедените сокови не содржат или содржат многу малку растителни влакна од овошјето (ова зависи од соковникот што го користите), а тука спаѓаат и витамините и антиоксидантите присутни во лушпата и надворешните слоеви на овошјето“, објаснува диететичарката РебекаГавторн. „Поради ова, овошјето станува полесно за пиење и помалку заситува“. Решение: вклучете ја лушпата секогаш кога е возможно и спасете ја пулпата за да ја вратите во сокот. 

ДАЈТЕ МУ ПРЕДНОСТ НА ЗЕЛЕНЧУКОТ
Суровиот зелен зеленчук содржи повеќе антиоксиданти и не влијае на нивото на инсулин. Затоа, 75% од сокот нека биде составен од зеленчук, а овошјето користете го за да го маскирате вкусот. Имајте на ум дека темнозелените ливчиња содржат поголемо кoличество витамини, минерали, антиоксиданти и полифеноли. Целерот и краставицата се одличен избор, а за енергетски старт на денот, зачинете со ѓумбир. 

ЏВАКАЈТЕ ГИ МАСТИТЕ
Напливот на шеќер и недостигот на растителни влакна во сокот, лесно ќе си поиграат со нивото на шеќер во крвта – ќе се соочите со нагло покачување и брз пад. Плус, вишокот шеќер е ризичен, бидејќи организмот може да го складира како масти, објаснува Џо Траверс,диететичар и автор на „Диета со малку маснотии“ („The Low Fat Diet“). Со вклучување растителни влакна, протеини и масти, ваквиот процес би се забавил. Затоа, вклучете чиа, лененово семе или протеини, а ако сепак се одлучите за сок, тогаш пијте го грицкајќи јатки. 150 мл е максималната доза сок што смеете да ја испиете одеднаш. Препорачаниот дневен лимит на слободни шеќери за возрасни изнесува 30 г; 300 мл чаша сок од портокал содржи 24 грама. Дајте им предност на овошјата коишто имаат понизок гликемиски индекс (ќе ве држат сити подолго време), како јаболката, бананите, црешите, грејпфрутот, мангото, праските, крушите, сливите и сувите сливи.

ИДЕАЛНА ФОРМУЛА
Идеалниот состав на смутито коешто целосно ќе работи во името на здравјето: малку протеини (одлични за да го контролирате апетитот без разлика дали се од млеко, јогурт, протеински прав); малку здрави масти од јатки, путер од јатки, авокадо, чиа; растителни влакна од пулпата на овошјето или од лушпата; бавно ослободувачки јаглехидрати од банана или овес; разновидно овошје и зеленчук за витамини и минерали. Ако смутито го пиете за ужина, а не како оброк, потпрете се на истата формула, но намалете ја порцијата. 

Мудри замени 
1.     Ако сакате да ги намалите јаглехидратите и природните шеќери, ставете само половина банана и половина млада тиквичка – замрзнатата нема да го смени вкусот.
2.     Само половина авокадо содржи од 150 до 200 калории. Ако на тоа додадете јатки, семиња, млеко, вашето смути ќе содржи 700 до 800 калории – небаре, колку еден оброк. Не комбинирајте ги заедно!

Напивка по мерка
Смути за по вежбање – замрзната банана, природен путер од кикирики, кокосова вода и лед. 
Ужина при напад за благо – замрзната банана, авокадо, чиа семе и кокосова вода. 
Сок за хидратација – краставица, целер, спанаќ, кељ, зелено јаболко и ѓумбир. 

БУНГУР

Исклучително богат со растителни влакна кои ја подобруваат дигестијата, како и протеини кои ја одржуваат мускулната маса и коските. Изобилува со магнезиум, минерал што го намалува заморот и го штити нервниот систем. 

КИВАНО

Овој интересен плод со потекло од Африка, обединува неколку вкусови, како банана, киви, диња, лимон. Зад неговиот бодликав изглед се крие цела една ризница од витамини – Ц, А, Б6 и минерали – магнезиум, железо, цинк, калциум, калиум, фосфор. Неговиот состав се базира на вода и многу малку калории, јаглеродни хидрати и масти. Речиси 16% од калориите доаѓаат од протеините (кивано од 209 г содржи 3.7 г протеини) што е релативно многу во однос на други плодови. Поради високото присуство на антиоксиданти, киваното е одличен сојузник во борбата против хронични заболувања како дијабетес, срцеви заболувања и одредени типови рак. Семките на плодот, кои се јадат, го снабдуваат телото со витамин Е, кој заедно со витаминот А, Ц и лутеинот, го прават киваното одлична антивоспалителна бомба. Киваното задоволува околу 13% од дневната потреба за железо кое во комбинација со витаминот Ц, промовираат соодветна продукција на хемоглобин во црвените крвни зрнца и на тој начин обезбедуваат транспорт на кислород меѓу клетките.  
Што да јадете за да го вратите балансот во телото после миксот од благо, кифлички, руска салата, газирани и алкохолни пијалаци?
 

ПОЈАДОК
Овесот помага да се неутрализира киселоста поттикната од алкохолот и разновидната храна. Направете овесна каша со банана за да го надоместите загубениот калиум; течности за да го хидратирате телото и зелен чај за да му дадете енергија.


РУЧЕК
На телото му се неопходни електролити да ги надомести загубените течности, особено ако сте претерале со алкохол, кафиња и останати дуеретици. Супата (без разлика дали е зеленчукова или има месо) ќе ве обезбеди со натриум и ќе ве снабди со доволно течност. 

УЖИНА
Варено јајце - од причина што содржи цистеин, киселина која ќе го разгради алкохолниот шеќер и етанолот. Комбинирајте ги со крекери, бидејќи нивните јаглеродни хидрати ќе го доведат во нормала нивото на шеќер во крвта. 

ВЕЧЕРА
Антивоспалителните масти во лососот можат да ја забават продукцијта на простагландин, хормон кој го нагласува мамурлакот и тешкотиите од масната храна. Напијте се вода со ѓумбир ако се чувствувате подуено и ви се гади од помислата да јадете. 
 
 
Печурки
Содржат селен, одличен антиоксидант кој ги штити клетките од оштетување и на тој начин го поттикнува имунитетот. 

Кисело млеко
Ќе ве држи сити подолго време, бидејќи изобилува со протеини (20 г во 1 шолја). Плус, ќе ве расположи во тмурните зимски денови, бидејќи ги намалува симптомите на депресија. 

Бел грав
Ги задоволува протеинските потреби подеднакво како и месото – 1/2 шолја содржи 9 г протеини и 7 г растителни влакна. 

Трупка
Изобилува со витамин Ц и растителни влакна и помалку од 20 калории во 1/2 шолја. Го штити срцето, а го намалува и ризикот од рак, благодарение на сулфорафанот кој ѝ дава горчлив вкус.

Лук
Одличен сојузник против бактериите и вирусите, благодарение на алицинот – активната сулфурна компонента што ја содржи.
 
 
 
Модерната и здрава замена за чипс гласи суво овошје. Но, колку овој сладок деликатес е безбеден?
 
Исто како и свежото, така и дехидрираното содржи витамини кои делуваат како антиоксиданти. Но, поради недостигот на вода, составот е далеку поконцентриран. Тука мислиме на растителните влакна, кои колку и да се добри, може да предизвикаат подуеност и грчеви. Сувото овошје содржи и повеќе шеќер, што значи и повеќе калории. Дури и незасладеното суво овошје содржи шеќери кои во големи количества тешко се преработуваат. Сулфатите(вообичаенконзерванс) знаат да предизвикаат главоболки и дијареја. Ако го јадете во умерени дози, сувото овошје со сигурност ќе ве одвлече од помалку хранливите ужини. За да не ја изедете цела ќесичка, купувајте од оние зачинети со чили.  
 
Мудри залци...
...за сувото овошје да не го вознемири стомакот

ПИЈТЕ ВОДА
Како катализитори на дигестијата, растителните влакна за кусо време ќе ве одведат во тоалет. Но, ако сте дехидрирани, тие ќе ја впијат секоја течност во организмот. Резултатот? Констипација. 

ДЕФИНИРАЈТЕ ГИ ПОРЦИИТЕ
Раздвојте го овошјето во различни кутии, по две парчиња од големите овошја (кајсии, праски, јаболка) и две супени лажици за ситните (малини, капини, брусница). Кесата однесете ја во кујна.

ВНЕСЕТЕ ПРОТЕИНИ
Кога омилената ужина ја комбинирате со протеини или некој извор на масти, како јатки или грчки јогурт, со сигурност ќе ги задоволите сетилата, па помали се шансите да претерате со шеќерните опции.

За Нас

Ваш Аптекар, наменето да ги задоволи вашите потреби за квалитетни информации во врска со употребата на лековите и другите средства кои ги земате во аптеките. Ние се грижиме за вашето здравје и ќе ви обезбедиме интересни содржини кои директно ќе влијаат врз вашиот приод кон лекувањето и начинот на живот воопшто.

Следете не на Facebook

Newsletter

Внесете ја вашата е-пошта и навремено дознајте за сите новости и информации поврзани со Ваш Аптекар.